Blogun tash e gjeni në dizajn të ri

Për ta vizituar blogun nga tash e tutje, duhet të drejtoheni në www.dardanhasku.com. Ky blog po mbahet i hapur për ta parë dizajnin e vjetër dhe për ta shfrytëzuar arkivën. Ju faleminderit!

A muni me besu sa i ka kushtu Aston Villës ndryshimi i simbolit?

Në të majtë është simboli i vjetër, e në të djathtë i riu

Tung miq. Tash e 2 vite nuk jam aktiv në blogun tim. Në vitet 2013-14 kam shkru’ mjaft shumë, kurse në vitin 2015 e kam publiku’ veç një shkrim.

Pastaj, domaini (dardanhasku.com) më skadoi e ta them të vërtetën as që më shkoi mendja me ri-ble.

Krejt rastësisht, para dy ditësh, më ra në mend blogu dhe e pashë që domaini skadoi, andaj e bleva. 

Tash, nostalgjia për entuziazmin që dikur e kisha për me shkru në këtë blog më inspiroi me bo këtë shkrim e me provu me u rikthy me shkrime të kohë-pas-kohshme.

Eh, shkrimi i parë në vitin 2016 si duket do të jetë për një lajm shumë interesant që e lexova.

Klubi i Aston Villës nga Anglia, që sot edhe zyrtarisht e siguroi rënien nga Premierliga, së fundmi ka vendosë me ndryshu simbolin e klubit.

Në fakt, për dikë që nuk është ndonjë fans i madh i klubit, ky ndryshim nuk do të ishte i vërejtshëm.

Lajmërimi i klubit për simbolin e ri

Ajo që klubi ka ndryshuar është se e ka larguar fjalën "Prepared" që ishte gjithmonë pjesë e simbolit dhe e ka "forcu" luanin.

Deri diku, gjithçka duket normale dhe në rregull.

Por, ajo që e bën të veçantë këtë ndryshim është se klubit i ka kushtuar plotë 80,000 funte!

Po, po - 80,000 funte (rreth 100,000 euro).

Mediat në Angli, fillimisht kishin raportuar se ky ndryshim ka kushtuar 2 milionë funte (rreth 2.5 milionë euro - paramendoni!), gjë që e ka detyruar klubin e Villës që të dalë me një deklaratë, ku mohon këto lajme, duke treguar se ka paguar vetëm 80,000 funte për këtë ndryshim, e jo 2 milionë, siç raportohej.

Ky rast dëshmon se puna e dizajnerit paguhet mirë dhe se ndryshimet e tilla, sado të vogla që janë, kërkojnë angazhim të madh të tyre, sepse në fund, detajet janë ato që të harxhojnë më së shumti kohë dhe energji.

Megjithatë, kur i krahasojmë të dyja ikonat, duket se nuk është bërë ndonjë punë edhe aq e madhe për të harxhuar aq shumë para. Ky rast kishte ngjallur edhe reagime të tifozëve, që e kanë kritikuar klubin për këtë hap të ndërmarrë. 

Ju si mendoni, a ia ka vlejtur që të paguhen 80,000 funte për këtë ndryshim? Shprehni mendimin tuaj në koment dhe këtë sondazh.

“Hajt se këta egërsirat e harrojnë”

Seç e kam një bindje shumë të fortë se, në prapaskena, politikuajt që për momentin janë në varësi të plotë nga faktori politik serb, janë duke e etiketuar popullatën e tyre ashtu siç Jabllanoviq i ka quajtur para disa dite, egërsira.

“Shef (një shef i rëndomtë, sepse numri i tyre është shumë i madh), situata po nxehet. Qysh po ia bojmë?”
“Taktikë e njëjtë si gjithmonë bre. Presim.  Dikur mediat lodhen, edhe qata popull që jon tu lu dal me protestu, lodhen dikur. Edhe egërsirat e harrojnë”.

(Pason qeshje kolektive).

Pafytyrësia e liderëve politikë kosovarë, që është e pashoq, shkon aq larg, sa nuk do të befasohesha nëse kjo bisedë më lartë do të dilte të ishte e vërtetë, fjalë për fjalë.

Na trajtojnë si të paditur, me epitete nga më të ndryshmet.

Jabllanoviq nuk është fare më ndryshe se politikuajtë që tash e 16 vite janë pjesë e një sistemi që gjithmonë ka fyer e keqtrajtuar popullatën kosovare.

Shumë nga ju, besoj se e keni akoma memorien e freskët, kur asokohe kryeministri i vendit e quajti një pjesë të popullit që ai përfaqëson “zagarë”.

Besoj se ky shembull është inspirues për Jabllanoviqin dhe serbët, ashtu siç është “inspirues” edhe Kryetari i Prishtinës, Shpend Ahmeti, sa herë që pyeten se pse nuk i respektojnë simbolet shtetërore.

E kjo “rutinë” e liderëve politikë kosovarë, që gjithmonë presin që një temë dikur të “harxhohet” në media dhe populli do ta harrojë, kësaj radhe nuk duket se do të ketë sukses.

Protestat dhe vëmendja e medias nuk po pakësohet, përkundrazi çdo ditë po zgjerohet edhe më shumë.

Nëse udhëheqësit e vendit tonë janë në gjendje që të luajnë me durimin e qytetarëve në këtë rast, siç kanë luajtur edhe në të kaluarën, i sfidoj ta bëjnë këtë gjë.

Fjalët e tyre se “serbët po integrohen”, koalicioni me Listën Serbe është “njohje e Kosovës” e të ngjashme, nuk besohen as nga vet ata.

Ose, fjalët e përfaqësueseve të Listës Serbe nëpër paraqitje publike, ku thonë se qëllimi i tyre i vetëm është që të integrohen dhe të ruajnë përfaqësimin e tyre në Kosovë, janë edhe më qesharake e ofenduese për inteligjencën e popullit.

Mirëpo, nëse rastësisht ka pasur njerëz që kanë qenë aq naiv sa që të besojnë diçka të tillë nga këto që thash më lartë, u bindën shumë me rastin e Trepçës dhe udhëtimin urgjent të ministrave serb në Beograd, ose edhe ma vizitën e fundit të Vuçiqit në Kosovë.

Është koha që populli ynë të mos durojë më fyerje të tilla nga politikuajtë kosovarë, të mos ndalet deri në trajtimin e drejtë nga ta dhe të kërkojë që përgjegjësia e tyre karshi qytetarëve të jetë as më pak e as më shumë se sa i takon një populli normal – njerëzore dhe e drejtë.  

Si të bëni kampanjë të fuqishme zgjedhore online, për vetëm 5 dollarë

Përshëndetje miq të mi dhe ju vizitorë të rastësishëm të blogut tim personal. Për informatë hyrëse për këtë shkrim të radhës në blogun tim personal, duhet ta dini se në zgjedhjet e fundit parlamentare isha kandidat për deputet nga radhët e Partisë së Fortë.

Në këto zgjedhje, arrita të fitoj 54 vota, shumë larg pritshmërive (për të mirë), pasi që isha futur në zgjedhje thjesht për të vazhduar përkrahjen time mbi idenë në të cilën funksiononte Partia e Fortë. Pra, votat ishin absolutisht në plan të fundit.

"Fushata" ime ishte e fokusuar në rrjetet sociale, dilja kohë pas kohe dhe bëja foto ose ide të rastit, me anë të të cilave thumboja politikanët e Kosovës në përgjithësi, për shkak se isha shumë i irrituar me fushatën që bënin ata. Mund të them se mënyra se si u prit fushata nga njerëzit e afërm ishte shumë më mirë se pritshmëritë e mia për këtë gjë.

Gjithsesi, gjëja që dua të veçoj nga kjo fushatë është se arrita që të marr vëmendje të gjërë të shumë portaleve dhe mediave online, krahasuar me shumën modeste që pagova, 5 dollarë (momentalisht rreth 3.7 euro), që ishte edhe buxheti im zgjedhor.

Për 5$ "fitova" më shumë shkrime dhe vëmendje nga mediat online (ndoshta) më shumë se politikanë të shumtë që paguanin shuma të mëdha që të merrnin ndonjë shkrim për fushatën që ata bënin.

E, si e arrita një gjë të tillë?

Së pari, po ua listoj gjërat që mu nevojitën për një gjë të tillë:

• Credit Card me minimum 5$ në të (që të kryhej pagesa për shërbimin);
• Miq të shumtë në Facebook, që të fitoja vëmendjen e duhur nga ndonjë media eventuale.

Kaq thjeshtë? Epo, kaq. Nuk më është dashur asgjë më shumë.

Pasi u sigurova se i kisha në dispozicion gjërat e kërkuara më lart, krijova një përdorues në Fiverr. Shpjegim i shkurtër: Fiverr është një faqe ku njerëz kryejnë shërbime të shumta për 5 dollarë. Për shpjegim më të hollësishëm, e kam një shkrim në blogun tim: Sa gjëra të mrekullueshme bëjnë njerëzit.. për 5 dollarë!

Kështu, hyra në faqe dhe kërkova për njerëz që do të bënin video qesharake për këtë çmim. Duke kërkuar e gjeta Ishanin!

Ishan është një i ri nga Sri Lanka, i cili për 5 dollarë do të bënte një shkrim në trupin e tij (çfarëdo që ju kërkoni) dhe do vallëzonte me të për 31 sekonda. E mrekullueshme, apo jo? Eh, kështu mendova edhe unë.

E bëra porosinë dhe e prita me padurim. Në udhëzimet e porosisë tregohej se ai e kryen shërbimin për dy ditë.

Edhe pse e bëri më vonesë dërgesën, mbeta abolutisht i kënaqur me kryerjen e shërbimit. E shkarkova videon dhe e postova në Facebook.
Menjëherë pas postimit të videos filluan pëlqimet dhe komentet e shumta, dhe këto më tregonin se videoja ka shumë gjasë se do shihet nga ndonjë media online, sepse të tilla gjëra tërheqin klikime edhe për ato.

Dhe, kështu ndodhi! Media e parë që e pa postimin pasi u përhap ishte reporteri, media e cila edhe e bëri para shkrimin, dhe e titulloi "Mbështetje interesante për Partinë e Fortë, nga Sri Lanka - VIDEO", me videon e ngarkuar në youtube.

Menjëherë pas reporterit, artikulli u shpërnda në mediat gjithandej. Zeri, Telegrafi, Gazeta Express, dhe shumë media tjera e morrën këtë shkrim duke e bërë një lajm të bujshëm, duke më sjellur emër ndër "simpatizantët" dhe mbështetësit e Partisë së Fortë.

E gjithë kjo, për vetëm 5 dollarë!

Përndryshe, ky ishte kulmi i "fushatës" sime, duke e kompletuar atë dhe duke më dhënë bindje se bëra mirë që hyra në këtë fushatë.

Jo gjithmonë paraja mund të ketë efektin e saj, nëse ideja nuk është si duhet, andaj ata që aspirojnë që në të ardhmen të mirren me politikë, i propozoj që në vend të shumave të mëdha, të harxhojnë pak mjete financiare e të mendojnë më shumë për ide kreative, pasi që në mediat online dhe në rrjetet sociale ka shumë hapësirë për të depërtuar me investime të vogla, deri sa keni ide të mëdha!

Suksese.